ఓహో
నువ్వు స్త్రీవా ....?
ఐతే ...?

నీ రొమ్ములకేమైనా 
కొమ్ములు ఉన్నాయా
నీ గుండెకు కవాటాలు కాక
కోటగోడలేమైనా ఉన్నాయా
నీ మెదడులో ఆలోచనలు కాక
పారిజాతాలేమైనా పూస్తున్నాయా
నువ్వు కూడా
నాలాంటి మనిషివేగా.

దేహ వైరుధ్యమంటావా...

నీకున్నవి నాకు
నాకున్నవి నీకు
కొన్ని వుండవు
వుండవు గాక వుండవు.
నువ్వూ నేనూ
రెండుగా తుంచబడ్డ
అసమాన అర్థశరీరాలం.

అవి కౌగిలిలోనే పరిపూర్ణం
కలయికతోనే సంపూర్ణం
అదే ప్రకృతి సూత్రం
అర్థం చేసుకుంటే
అదే అర్ధనారీశ్వర తత్వం.